BON NADAL E FELIZ 2009
O equipo da biblioteca quere felicitar as festas a toda a comunidade educativa. Que o pasedes moi ben e que teñades un 2009 feliz!
Aquí tedes a nosa felicitación. Non diredes que non hai marcha na biblio!

This funky card is created by Libraco.
Create your own funky card at CardFunk.

10º ANIVERSARIO (e 4)

Tal e como prometemos, aquí vai a 4ª, e última, entrega sobre o cumpreanos do noso 'insti'. Aquí tedes o vídeo do desfile e o corto cortiño que fixemos entre todos no taller de animación dixital.

É un bo momento para agradecerlles a colaboración a todos os que participaron na celebración deste aniversario, desde o alumnado ata as empresas colaboradoras, que aportaron o seu traballo e os seus materiais. Grazas tamén ao profesorado participante, e a Javier (E.F.) especialmente, por coordinalo todo e a todos, que non é cousa fácil. O traballo de organización que hai detrás das actividades non se nota, o que quere dicir que, como tantas veces, está ben feito.

As fotos que sempre pedides (despois de aquilo de "non, profe, a min non") estarán á vosa disposición na biblioteca o ano que ven!

10º ANIVERSARIO 3

Deixamos aquí outra tanda de fotos, que corresponden ao encontro de pola tarde.

O vídeo do desfile tardará algo máis, leva máis tempo, pero todo chegará.

CELEBRACIÓN 10º ANIVERSARIO 2

Tal e como prometemos, aí vai outra tanda. E aínda queda algunha por vir!

Vídeos exportados

ESTAMOS DE CUMPREANOS
¡Cumprimos 10 anos!
Alá polo 1998 empezaba a súa andaina este Instituto, aínda cos albaneis traballando dentro. Desde aquela son, sodes, moitos os que pasáchedes por aquí, alumnos e profesores. Non sempre é posible recordar todos os nomes, pero todos tedes un pequeno oco na historia deste centro. E gustaríanos pensar que tamén levades un pequeno anaco do instituto con vós.
O xoves 18 celebramos o aniversario por todo o alto, cunha chea de actividades pola mañá e cunha convivencia moi agradable pola tarde, entre alumnos, familias e profesores. Que gustazo ver o instituto cheo de xente!
Na celebración repasamos, de xeito moi resumido, os 10 anos de funcionamento, a xeito de recordatorio simbólico de todo e de todos.

Desde a biblioteca, queremos darlle as gracias especialmente a aqueles que sempre estiveron dispostos a botar unha man para conseguir que funcione do mellor xeito posible. Graciñas.

E como aperitivo, ademais do aparecido na Voz de Galicia, deixamos aquí unha pequena mostra da celebración. Seguirán máis, así que atentos.

Actividades Pavillón

Boletín VILÁN da Biblioteca
Xa tedes á vosa disposición o boletín Vilán Nº 7, o primeiro deste curso, con noticias do acontecido (polo menos en parte) durante ese primeiro trimestre. Todos os interesados podedes coller un na biblioteca e levalo con vós.
Tamén tedes unha nova guía de lectura, con algunhas suxestións para este Nadal, aínda que podedes ler moitas outras cousas. Cada un ao seu gusto!
Recordade que durante as vacacións a biblioteca aumenta o número de libros para préstamo, e podedes levar ata un máximo de cinco por carné. Coma sempre, están invitados a utilizar o préstamo os membros das vosas familias.

Daltonismo VITAL

Alicia Baña Castro

Xa cando estaba no instituto (na foto) gañaba premios literarios. Contaba unhas historias como esta que podedes ler aquí, que aínda hoxe conservamos. Agora escribe poesía.

"Daltonismo VITAL" é o título do libro que presentou o domingo, día 7 de decembro na libraría LER de A Ponte do Porto. Unha vez feita a presentación e escoitados algúns dos poemas, de propia voz, podemos afirmar que Alicia o 'daltonismo' de Alicia non é máis que unha visión moi lúcida do mundo, aínda que neste primeiro poemario sexa un tanto oscura.

Día Mundial contra a sida
O lazo vermello é o símbolo da loita contra a Sida. Cada 1 de decembro dende 1988, conmemórase o Día Mundial contra a Sida.

Actúa. Detén a sida, unidos podemos.

Entre 1981 e 2007 rexistráronse no país 3.582 casos de Sida, dos que o 77 por cento dos afectados foron homes. Sanidade calcula que un de cada tres infectados polo virus VIH non sabe que é portador. Ao non existir vacina nin cura, é a prevención o único método para evitar o contaxio.

Ás carreiras en Cee

Xa podedes ver a entrada sobre o campo a través deste xoves pasado en Cee, en "Pedras do Vilán".

25 de novembro
Día internacional da eliminación da violencia contra a muller.

Desde o Equipo de Normalización Lingüística e desde a Biblioteca, queremos poñer o noso graniño de area para axudar a acabar con esta violencia machista.

Todos os días do ano deben ser días de non violencia!!

Visitade a exposición para estar informados e deixade aquí algún comentario solidario.

Get your own - Open publication

E ás veces confundimos misterio e perigo, pero ese che é outro conto. Aquí nos limitaremos a falar de misterio. O misterio dun bo libro. Por que non deixarse atraer por un libro?
Indo máis aló: por que non deixarse amar por un libro. Realmente pode chegar a chuparnos o tempo, a sentilo parte de nós…, ou estarei esaxerando moito?
Vedes o expositor da biblioteca, alí onde os libros (e tebeos, revistas, dvds...) chaman por vós…
Estes día anda por alí un libro sobre vampiros. Sobre eses entes chupoteiros e de mala fama. Eso é graciñas á imaxe hollywoodense dun vampiro que tedes na vosa cabeciña, porque, postos a pensar, por que teñen que ser malos? Non pode haber algún vampiro bo?
Píllache o libro e averigua quen é o Edward e por que misteriosa razón resulta tan atractivo.
E lembrao, se na páxina vinte non te prendeu a súa lectura, podes deixala. O abandono da túa parella (sen pensalo), pode ser fatal, pero deixar un libro que non gusta é un exercicio de libertade intelectual.

Este libro, que parece que ten éxito, é parte dunha serie creada por Stephenie Meyer. Que decides? Seguimos co resto dos títulos da serie? Podes enterarte algo mais visitando esta páxina

SAÍDA DE CIENCIAS NATURAIS Á CORUÑA
Xa tedes a entrada correspondente á excursión que fixeron os de 1º e 3º á 'Coru' o martes pasado no apartado Pedras do Vilán. Saídes todos e todas moi 'ghuapiños' e 'ghuapiñas'!

UN PRECIOSO LIBRO

O pasado xoves día 13 presentaron na Coruña un novo libro Xabier P. Docampo e Xosé Cobas. Estivemos alí e rímonos coas ocorrencias de Xabier (sempre nos divertimos con el). Xabier Docampo e Xosé Cobas, ademais de amigos nosos, son vellos coñecidos no noso instituto, xa que estiveron varias veces nel. Unha vez, hai xa algúns anos, estiveron xuntos e, mentres que Xabier nos contaba un conto (deses que conta tan ben el), Xosé Cobas foi facendo unha ilustración que aínda hoxe conservamos con agarimo. Está enmarcada e colgada na entrada da nosa biblioteca.

Este novo e marabilloso libro ten por título O libro das VIAXES IMAXINARIAS e xa está na nosa biblioteca asinado polos autores, agardando que alguén empece a disfrutalo.

TEMPO DE OUTONO

Hoxe é o día de San Martiño. Esta é unha das festas que figuran na pequena exposición sobre o outono que temos no vestíbulo do instituto. Para completala aí vai un refrán: "Polo San Martiño, peóns ao camiño" que ten relación co xogo dos trompos, buxainas ou peóns, xa que este é o tempo de sacalos a bailar. Pica nas frechas para pasar as follas da exposición. Se queres ler pica enriba para aumentar o tamaño.

Get your own - Open publication

Inauguramos unha nova sección no blog da biblioteca que, esperemos, pódelle vir moi ben a mais dun e dunha cando teñan que elaborar un traballo e/ou buscar información. Trátase dunha selección de páxinas web organizada do mesmo xeito que están organizados os fondos da biblioteca: pola CDU, sinalizada por números e cores. O enlace está na columna da dereita deste blog.

Atoparedes un primiro enlace igual que os carteis que tedes colgados na biblio, para axudar a localizar a información que precisedes. Logo, picando en cada apartado, iredes a unha selección de páxinas que pensamos que vos poden axudar.

Lamentamos comunicar que aínda non atopamos a páxina máxica na que aparezan os traballos xa feitos (chámanse 'traballos' por algo) e o 'rincón del vago' xa está mais visto que os capítulos do "Internado", ou sexa, que non cola.

Esperemos que con esta axuda os traballos sexan un pouco mais doados de facer.

A FESTA DO SAMAÍN

Aínda que este ano non fixemos o concurso de cabazas, debido á pouca participación que houbo no curso anterior, esperamos que o próximo ano esteades máis animados e poidamos facelo. De todos xeitos non queremos que pase desapercibida esta festa, se picades aquí encontraredes unha páxina con información. E se ides a Pedras do Vilán aínda atoparedes máis sorpresas.

Ah! Sabemos que un alumno de 1º non se puido resistir e fixo a súa cabaza que colocou na clase.

BUSCANDO UNHA PELI

Un dos lugares máis frecuentados este curso está sendo a torre dos dvds con películas. Desde hai quince días unha marea de alumnado de 1º está usando os seus carnés recén estreados, para lucir un dvd recén recollido.
Para animar ós de 2º pillamos aquí a este par de mozos en plena fase de selección.
Quisera animar a todos para que fagan o mesmo, xa que o cine aprende moitas cousas, entre elas a ler as imaxes gráficas en sucesión.A particular homenaxe ó alumnado de 1º vai nas Pedras do Vilán.

BIBLIOTECA E FAMILIAS
Onte pola tarde, aproveitando as reunións de titoría de 1º e 2º, mantivemos un encontro coas familias do alumnado novo, de 1º da ESO, na biblioteca. Nesta xuntanza entregámoslles unha carpetiña con información sobre a biblioteca e sobre o centro, así como unha carta na que se lles informaba das actividades previstas para realizar en conxunto e ás que voluntariamente se podían apuntar: Clubs de Lectura Arao, Lendo a Pares, Cine para Falar e Mochilas Viaxeiras. Tamén lles recordamos que a Biblioteca está aberta a toda a comunidade educativa, e que poden vir a visitarnos os xoves pola tarde; estaremos encantados de recibilos.
Podedes ver o material entregado picando aquí, ou na nova sección Biblio e Familias, que atoparedes na barra lateral do blog.
Esperemos que estas iniciativas teñan boa acollida e este curso sexamos aínda máis a participar nestas actividades conxuntas.

Noraboa Teenagers!!

Felicitacións para todos os participantes e participantas no mural de azulexo do curso pasado (grazas á santa pacencia de Javier Brey) que aparecen na edición internacional da revista Azulejo Internacional!

Podedes ver máis detalles en Pedras do Vilán!

Premio Nacional de Literatura

Acaba de coñecerse o Premio Nacional de Literaura Infatil e Xuvenil deste ano, que lle foi otorgado ao noso benquerido Agustín Fernández Paz, recoñecendo así o traballo tan estupendo que Agustín ven facendo dende hai xa moitos anos. Os seus libros sempre tiveron unha moi boa acollida entre os lectores xuvenís. Na biblioteca do Instituto podedes atopar varias obras súas, incluíndo esta última, gañadora do premio. Non vos extrañe se algún deses libros non está tan noviño coma outros, porque seguramente xa foi lido por varias persoas, que é o mellor premio que un libro pode ter.
Aquí podedes ver e escoitar ao propio Agustín nunha entrevista feita hai pouco tempo. Tamén podes ler a entrevista e o artigo publicados en 'La Voz de Galicia' o día 26
FELICIDADES, AGUSTÍN!! E a vós: felices lecturas!

"SCUSATE IL RITARDO"
"Perdoade o retraso", como dicía V. Rossi ao reconquistar o título mundial de Moto Gp, logo de dous anos.
Aquí, no blog, as escusas veñen porque este principio de curso estivemos un tanto lentos, e pasaron algunhas cousas que non apareceron no blog: o principio de curso, a apertura da biblio, a visita de Stephen Hawkins (aí queda eso!!) a Fisterra...

Como compensación deixamos na nova sección "Pedras do Vilán" un lotiño de fotos (o primeiro, logo virán máis) da marcha que fixemos de Traba a Laxe.

E, por suposto, darvos a todos unha cálida BENVIDA!!!

ABRINDO PORTAS

BENVIDOS/AS A TODOS/AS
Aínda non empezou o curso pero xa andamos por aquí con bastante movemento. Hoxe tivemos unhas xornadas de presentación do Instituto para as familias. Falamos un pouco de todo: da colaboración cos Servicios Sociais do Concello, da Asociación Abondou, da Atención á Diversidade, da Convivencia no centro e, como non, da Biblioteca.

Para rematar os da Escola Taller de Aldea Madeira fixéronnos unha exhibición do que saben facer cos pinchos, tanto na cociña como na atención ao público. Un aplauso para estes ex-alumnos do centro (aínda que dan gañas de 'suspendelos' para obrigalos a repetir os pinchos cen veces).

Estamos convencidos de que cousas coma esta axudarán a sentirnos todos mellor, perder medos que non fan falta e sentirnos ben no instituto.

Ata moi prontiño!

BubbleShare: Share photos - Play some Online Games.

ATA A PRÓXIMA!
Esto acábase e o curso xa non dá máis de si. Xa sei que moitos de vós non queriades que rematase para non ter que pasar o verán indo á praia durante o día e ás festas polas noites. Pero xa se sabe... todo o bo remata axiña!!
A biblioteca tamén pechas as portas, as de madeira, pero queda aberta todo o verán, nos libros que sacáchedes para que pasaran as vacacións con vós. Por certo que non era mala idea intercambialos entre vós cando os vaiades rematando!

Sempre podedes, se vos apetece, botarlle unha ollada ao noso catálogo, que seguro que ten máis dun enlace que vos pode gustar!
Este ano tivemos unhas cantas novidades importantes, sacamos un boletín novo, 'O Rexubeiro' e naceron dous clubs de lectura: Arao grande e Arao pequeno, ademais de seguir coas actividades doutros anos. Seguro que o próximo curso as actividades terán continuidade coa xente que xa participou este ano e coa xente nova que se apunte.
Como despedida de curso déixovos aquí unhas cantas imaxes de recordo.
FELIZ VERÁN!
VÉMONOS!

BubbleShare: Share photos - Play some Online Games.

"Pedraguiambiental"

Xa temos preparado o enlace co blog Pedraguiambiental, que está relacionado co proxecto de Voz Natura que se leva a cabo no noso insti.

Un blog moi movido, con novidades constantes, que podedes visitar picando no listado de enlaces que tedes na columna dereita, en oscuro, desta mesma páxina.

Noraboa ao coordenador do blog e a todos os que xa están deixando alí os seus comentarios. Benvidos á blogosfera!!

Érache o que había!

Por este curso, o grupo de teatro do Insti "Éche o que hai" deixa caer o pano e despídese ata outra ocasión. Despedíronse coa representación da obra "Quen matou ao Sr. Torres?"

Fixeron un 'dobrete', representando a obra dúas veces consecutivas. Na primeira non tiveron un público moi colaborador, pero na segunda, cun público moito máis atento, a cousa funcionou realmente ben.

Teremos que esperar ata comezos do próximo curso para ver a seguinte representación, cunha obra máis longa que seguro que, sabendo de quen vén, terá máis dunha sorpresa! Mentres tanto aquí tedes unhas fotos para facer boca:

BubbleShare: Share photos - Powered by BubbleShare

Rematamos por este curso o "Sabías que...?". Foi bonito mentres durou!!

Persoalmente podo dicir que foi un pracer ver como moitos e moitas se "rompían a cabeza" buscando as solucións ás preguntas, apostas e pistas.

A xente traballou ben, como o equipo da foto, que acabou sendo o gañador, seguido moi de cerca polas segundas clasificadas. E coidado cos de 1º que quedaron terceiros a tan só 2 puntos do equipo subcampión.

O ambiente foi tan bo que a organización decidiu (só por este ano) duplicar os premios á participación, que de catro pasaron a oito.

Parece que os afortunados disfrutan do seu merecido premio!!

BubbleShare: Share photos - Powered by BubbleShare

Visita á exposición

Durante este mes de maio estiveron expostos no corredor da planta baixa os magníficos carteis sobre o autor homenaxeado no Día das Letras Galegas Xosé María Álvarez Blázquez. Nas clases de galego dedicamos unha sesión a visitala. Na clase formamos grupos de catro e a profe preparou un cuestionario con preguntas. Foi unha clase diferente e gustounos, a profe quedou moi contenta cos resultados e fixo algunhas fotos mentres nós traballabamos.

Sesións de contacontos

O venres, día 30, o ENDL organizou dúas sesións de contacontos para o alumnado de 1º e 3º de ESO. Estas sesión correron a cargo de Avelino González, actor de teatro, cine e numerosas series de TV. Antes do recreo foron os alumnos de 3º e despois os de 1º. Podedes visitar a web deste actor picando aquí.

Rímonos moito escoitando os contos de Avelino. Éstivemos moi atentos e divertímonos moito (polo menos os de 1º). Se mirades as fotos podedes comprobalo.

Correlingua 2008

Como cada ano por estas datas o insti participa no Correlingua que se celebra na Coruña. Enchimos dous autobuses ata os topes e alá fumos. Unha marea azul, coas camisetas que regalaba a organización.

Tamén como sempre, houbo ex-alumnos que se acercaron por alí a saúdar a profes e amigos. Algúns pasaron prácticamente a xornada enteira con nós. É un gustazo ver como os 'ex' seguen a acordarse do seu paso polo instituto... por moito que protesten mentres son alumnos!

Pode que moitos dos asistentes non lle den importancia neste momento, pero seguro que outros son xa conscientes de que a nosa lingua ten un perigo real de desaparecer se non a mimamos nós un pouco. Como di a pancarta, o Galego ten a súa maxia!

Correlingua 08

Arrancamos!!

Xa comenzamos o "Sabías que...?" deste curso. Durante as seguintes catro semanas tentaremos de 'loquear' aos tolos e tolas (benditos tolos e tolas) que se apuntaron coas preguntas e cos xogos semanais. Recordade que co preguntón teredes un punto por cada resposta correcta e, ademáis, podedes conseguir puntos extra coa "Aposta Semanal" e con "as 5 pistas".

Este curso podedes consultar os cuestionarios nesta páxina, e tedes un enlace permanente na columna lateral do blog.

SORTE !!

Un día do libro... teatral !

Estos si que lle botan teatro á cousa. O grupo do teatro do Instituto "Éche o que hai" puxo onte en escena "Obras son amores e non boas razóns". E fíxoo por duplicado, en dúas sesión sen case descanso, unha para cada ciclo.

Por fin, as horas de traballo, os ensaios dos venres comendo no insti, e a pacencia de Silvia, tiveron recompensa. Prometeron que en breve voltarán ao escenario para representar outra obra.

Non foi mal xeito de celebrar o día do libro, que complementamos coa edición dunha guía de lectura. E como non todo son libros, hoxe mesmo, as 6, o club de lectura Arao-adultos veremos unha película relacionada co último libro que lemos. Seguro que repetiremos.

Sabías que... xa está a pique de arrancar o Sabías ...que? deste ano?

Pois xa sabes, se non o sabías agora xa o sabes!
E a saber: o prazo de inscrición xa está aberto e remata o próximo venres día 25!

Anímate!

Xunta a tres tolos máis coma ti e apúntate!

Podes ver as bases completas no taboleiro da biblioteca.